Onurak asmakizunak babesteagatik

Abantaila asko izango dituzu zure asmakizunak babesten badituzu:

• Merkatuan leku sendoa eta lehiatzeko abantaila izatea
• Asmakizunaren babes-tituluaren bidez, babestutako asmakizuna beste batzuek komertzialki erabil dezaten saihesteko eskubide esklusiboa bereganatuko du titularrak eta, horrela, ziurgabetasuna, arriskua eta lehia murriztuko da.

• Etekinak handitzea eta inbertsioen errendimendu handiagoa izatea
• Denbora eta dirutza handia inbertitu badituzu I+G+b jardueretan, horien ondoriozko asmakizunak babesteak gastuak berreskuratzen eta inbertsioen errendimendu handiagoa lortzen lagunduko dizu.

• Babes-eskubidearen lagapen edo lizentziatik datozen sarrera osagarriak izatea
• Asmakizun bat babesteko eskubide baten titular zaren aldetik, diru-sarrera gehigarriak sor ditzakezu, hirugarrenei eskubidea lagatuz (salduz) edo lizentzia-hitzarmen baten bidez, non hirugarrenei baimena emango diezun zure asmakizuna zenbateko finkoen eta/edo abantailen (royalties) truke ustiatzeko.

• Lizentzia gurutzatuak emanda teknologia erdiestea
• Beste batzuen jabetzako teknologian interesa baduzu, asmakizunen babes-tituluak erabil ditzakezu lizentzia gurutzatuen akordioak negoziatzeko.

• Merkatu berrietara heltzea
• Babestutako asmakizunen gainean lizentzia-hitzarmenak negoziatzeak, bestela eskuragaitzak izango liratekeen beste merkatu batzuetara heltzeko aukera ekar dezake. Horretarako, asmakuntzak kasuan kasuko atzerriko merkatuetan ere babestuta egon behar du.

• Besteek zure asmakizuna babestea eragoztea
• Nahiz eta asmakizun baten babes-tituluak berez ez duen asmakuntza bat "erabiltzeko askatasuna" ematen, beste batzuek asmakizun berdinak edo antzekoak babestea galarazten du eta asmakizun babestu berria eta "teknikari dagokionez" ezberdina dela adierazten du.

• Arrazoizko interes-tasan finantzaketa lortzeko ahalmena handitzea
• Asmakizunen babes-eskubideak izateak edo beste batzuen eskubideak erabiltzeko lizentzia izateak produktu bat merkatuan jarri ahal izateko kapitala lortzeko ahalmena handi dezake.

• Lege-ekintzei ekiteko gaitasuna handitzea
• Asmakizun baten babes-tituluak izateak nabarmen handituko du babestutako asmakuntza kopiatu edo imitatzen duten aurka legezko ekintzak hartzeko ahalmena.

• Zure produktuen irudi berritzailea ematea
• Gomendagarria da produktuetan, bilgarrian edo publizitatean hura babesten duen patentearen zenbakia adieraztea, publikoari irudi berritzailea proiektatzeko.