Beneficios de protexer as indicacións xeográficas

A protección de indicacións xeográficas de produtos artesanais e industriais ten como fin conservar e desenvolver o patrimonio cultural, así como contribuír ao incremento da rendibilidade e ao atractivo de profesións artesanais tradicionais.

Para os consumidores, constitúe unha garantía sobre a calidade e a autenticidade dun produto, sobre as técnicas de fabricación e/ou as tradicións asociadas á orixe xeográfica dos produtos.

Para os produtores, é un modo de valorar os seus produtos e o seu saber facer, así como unha ferramenta eficaz contra a competencia desleal e as falsificacións. Desta forma, atoparán incentivos para a elaboración de produtos de calidade e terá un efecto positivo xeral nas zonas onde se fabrican estes produtos. Nestas zonas contribuirase á creación de postos de traballo, reforzando a competitividade de fabricantes e PEMES. Tamén terá un impacto positivo no turismo nacional e rexional.

As Indicacións xeográficas estarán protexidas contra:

• todo uso comercial directo ou indirecto da indicación xeográfica en relación con produtos non amparados polo rexistro, cando os devanditos produtos sexan comparables aos produtos amparados polo rexistro ou cando o uso do nome se aproveite do renome da indicación xeográfica protexida, o debilite, dilúa ou prexudique;
• todo uso indebido, imitación ou evocación do nome protexido como indicación xeográfica, mesmo se se indica a verdadeira orixe dos produtos ou servizos ou se a indicación xeográfica protexida se traduce ou se acompaña de expresións tales como «estilo», «tipo», «método», «producido como en», «imitación», «sabor», «fragrancia», «parecido» ou similar;
• calquera outro tipo de indicación falsa ou enganosa en canto á procedencia, a orixe, a natureza ou as calidades esenciais do produto que se empregue na embalaxe interior ou exterior, no material publicitario ou en documentos ou información proporcionados en interfaces en liña relativas ao produto, así como a utilización de envases que polas súas características poidan crear unha impresión errónea en canto á súa orixe;
• calquera outra práctica que poida inducir o consumidor a erro en canto á verdadeira orixe do produto.

Todo produtor que cumpra cos requisitos do prego de condicións poderá usar, nos produtos designados, o nome protexido, o símbolo da Unión establecido para as indicacións xeográficas protexidas, a mención «indicación xeográfica protexida» e a abreviatura «IGP».

Ademais, todos os produtores do produto designado mediante unha indicación xeográfica protexida poderán unirse en calquera momento á agrupación de produtores que solicitase o rexistro do nome como indicación xeográfica, sempre que cumpran co prego de condicións.